Google Search Console Indexing Problem: (Canonical Tag Aur Sitemap Ka Desi Ilaaj)
 |
| Google search console indexing problems? |
Naya blog bna kar post likhna ek taraf, aur un posts ko Google par dikhana dusri taraf. Shuruat mein hum bohot khush hokar 10-15 posts likh dete hain, par jab ek mahine baad bhi Google par site ka naam search karne par kuch nhi dikhta, toh dimaag ka dahi ho jata hai.Phir jab hum darr kar Google Search Console ka dashboard kholte hain, toh wahan ajeeb-ajeeb English mein errors dikhte hain jinhe dekh kar lagta hai ki bhai humne koi bada crime kar diya hai.
Sach batau toh jab maine pehli baar Search Console khola tha, toh mujhe lagta tha ki yeh coding waale logon ka kaam hai, hamare bas ka nhi. Wahan likha aata tha "Alternative page with proper canonical tag" ya "Sitemap couldn't fetch". Dimaag ghum jata tha ki yaar post likhne baithe the, ya software engineer banne.
Par dosto, ye koi badi bimari nahi hai. Aaj main aapko koi technical boring gyaan nhi dunga, balki seedhe apne experience se 8 headings mein samjhaunga ki Search Console ke in bheege-billi waale errors ko mobile se hi kaise jadd se khatam karna hai.
1. Google Search Console Ka Asali Kam: Yeh Indexing Kya Hoti Hai?
Pehle bilkul simple bhasha mein samajhte hain bhai ki yeh indexing ka lafda kya hai. Maan lo Google ek bohot badi library hai, aur aapka blog ek nayi kitab. Jab tak library ka manager (Google ka robot) aapki kitab ko padh kar apni almari mein nahi rakhega, tab tak koi reader use dhoondh nahi payega. Isi almari mein rakhne ke process ko "Indexing" kehte hain.
Search Console ka kaam bas itna hai ki wo apko batata hai ki Google ke robot ne aapki post ko almari mein rakha ya nahi. Agar wahan "Not Indexed" dikha rha hai, toh iska matlab robot aapke blog par aaya toh tha, par kisi wajah se gussa hokar bina post liye chala gaya. Ise sahi karna bohot zaroori hai qki bina index hue aap chahe duniya ka sabse killer article likh lo, views '0' hi rahenge.
2. Alternative Page With Proper Canonical Tag: Is Bhoot Ka Asali Ilaaj
Bohot se naye bloggers jab apna dashboard kholte hain, toh unhe sabse zyada yahi error dikhta hai—"Alternative page with proper canonical tag". Ise dekh kar log darr jaate hain ki site block ho gayi kya?
Suno bhai, iska matlab bohot simple hai aur ismein darne ki 1% bhi baat nahi hai. Jab aap mobile se apna blog kholte ho, toh URL ke aakhri mein ?m=1 lag jata hai. Google ka robot jab aapki site par aata hai, toh use ek hi post ke do roop dikhte hain—ek desktop wala normal URL aur ek mobile wala ?m=1 wala URL. Google samajhdar hai, wo mobile wale URL ko chhod deta hai aur asali desktop wale URL ko index kar leta hai. Toh agar aapko yeh dikhe, toh samajh jao ki Google ne aapka kaam khud hi sahi kar diya hai, ismein apko apni taraf se kuch nhi karna hai!
3. Sitemap Couldn't Fetch: Jab Google Aapka Rasta bhatak Jaye
Sitemap ka matlab hota hai aapke blog ka naksha (map). Yeh ek aisi file hoti hai jo Google ke robots ko batati hai ki aapke blog par total kitne kamre (posts) hain aur un tak kaise pahunchna hai. Naye blogs mein akshar dikhta hai—"Sitemap couldn't fetch" ya red color ka error.
Iska lafda tab hota hai jab aap sitemap ka URL galat daal dete ho ya sitemap submit karke turant check karte ho. Blogger ka sitemap submit karne ka ekdum desi aur asali tarika hai. Apne Search Console ke sitemap wale box mein jao aur wahan sirf sitemap.xml likh kar submit kar do. Agar fir bhi "couldn't fetch" dikhaye, toh tension mat lo, 24 gante ka sabr rakho. Google thoda waqt leta hai nakshe ko samajhne mein, wo apne aap Green color ka "Success" dikha dega.
4. Discovered - Currently Not Indexed: Google Ne Dekha Par Chhod Diya
Yeh error aajkal har dusre blog par aa rha hai. Iska matlab hai ki Google ko pata chal gaya hai ki aapne ek naya article likha hai (Discovered), par usne abhi tak use almari mein nahi rakha (Not Indexed).
Aisa q hota hai pata hai? Jab aapka blog ekdum naya hota hai, toh Google aapki site par roz-roz nahi aata. Wo aapki post ka link bacha kar rakh leta hai ki "jab time milega tab index karunga". Ise tezi se thik karne ka tarika yeh hai ki aap khud se "Request Indexing" button par click karo. Apni post ka link upar search bar mein dalo, Enter maro, aur fir "Request Indexing" par click kar do. Isse Google ke robot ko ek jhatka lagta hai aur wo jaldi aakar aapki post le jata hai.
5. Crawled - Currently uNot Indexed: Padh Liya Par Pasand Nahi Aaya
Yeh upar wale error se thoda alag aur kharab error hai. Iska matlab hai ki Google ka robot aapke blog par aaya, usne aapki poori post ko upar se neeche tak padha (Crawled), par use aapka content pasand nahi aaya aur wo bina index kiye chala gaya (Currently Not Indexed).
Bhai, agar aapke blog par yeh error aa rha hai, toh iska matlab aapke content mein gadbad hai. Ya toh aapne ChatGPT se jaisa ka taisa copy-paste mara hai, ya fir aapka article bohot chota aur adhura hai. Ise sahi karne ka ek hi rasta hai—apne article ko dobara kholo, usmein apna desi touch dalo, headings ko sahi karo, aur thoda bada karke dobara request dalo. Google ka robot jab dobara aayega aur naya maal dekhega, toh makkhan ki tarah index kar dega.
6. Robot.txt Ka Panga: Google Ko Apne Ghar Mein Kaise Bulayein
Blogging mein ek choti si file hoti hai jise kehte hain robots.txt. Yeh file aapke blog ke gatekeeper (chowkidar) jaisi hoti hai. Agar is file mein koi galat setting ho gayi, toh yeh Google ke robots ko aapke blog ke andar aane se hi rok degi.
Blogger ki settings mein jaakar custom robots.txt ko hamesha dhyan se check karo. Shuruat mein agar aapko coding nahi aati, toh use default (normal) par hi rehne do, zyada chhedkhani mat karo. Agar gatekeeper hi rasta band kar dega, toh Search Console mein hamesha "Blocked by robots.txt" ka lafda dikhta rahega. Gate hamesha khula rakho taaki robot jab chahe aakar aapka maal le jaye.
7. Mobile-Friendly Errors: Jab Post Mobile Mein Fatne Lage
Aaj ke time par 95% log aapka blog mobile par hi padhte hain, jaise abhi aap mera post padh rahe ho. Agar aapke blog ka text bohot chota hai, ya do links aapas mein ekdum chipke hue hain, toh Search Console mein error aayega—"Text too small to read" ya "Clickable elements too close together".
Ise thok-bajakar sahi karne ke liye hamesha ek acchi aur saaf theme use karo jo mobile mein ekdum makkhan jaisi khule. Post likhte waqt paragraphs ke beech mein thoda space rakho aur headings ko thoda bada rakho. Jab mobile view ekdum smooth ho jayega, toh Search Console ke saare red errors apne aap green ho jayenge.
8. Indexing Fast Karne Ka Master Plan: Ek Bhai Ki Salah
Aakhri aur sabse kaam ki baat suno bhai. Google Search Console koi aisa switch nahi hai jise on karte hi lakhon views aa jayenge. Yeh bas ek report card hai. Agar aap chahte ho ki aapki har post likhte hi 10 minute mein Google par live ho jaye, toh aapko "Consistency" rakhni padegi.
Jab aap roz ek pakke time par post dalna shuru karte ho, toh Google ke robot ko aapki aadat pad jaati hai. Use pata hota hai ki "yeh banda roz shaam ko 5 baje naya maal dalta hai", toh wo khud hi 5 baje aapki site par mandrane lagta hai. Short-cut ke chakkar mein roz dashboard check karke dimaag kharab mat karo, bas quality content likho aur upar bataye tarike se link submit kar do. Baki kaam Google apne aap kar dega.
๐ Dil Waale Sawaal Aur Seedhe Jawab (FAQs)
Q1. Request Indexing karne ke baad kitne din mein post Google par aati hai?
Jawab: Agar blog naya hai bhai, toh request daalne ke baad bhi 24 gante se lekar 3-4 din tak ka samay lag sakta hai. Bar-bar request button mat dabana, ek baar karke chhod do.
Q2. Kya sitemap error hone se AdSense approval mein dikkat hoti hai?
Jawab: Haan dosto! Agar sitemap sahi nahi hoga toh Google ko pata hi nahi chalega ki site par kitne posts hain. Jab posts hi nahi dikhengi, toh AdSense "Low Value Content" bol kar reject kar dega. Isliye sitemap ka green (Success) hona zaroori hai.
Q3. Kya 'Alternative page with proper canonical tag' se traffic rukta hai?
Jawab: Bilkul nhi bhai! Maine bataya na, yeh koi error nahi hai. Yeh bas Google ka ek notice hai ki usne mobile wale faltu link ko chhod kar desktop wale asali link ko index kar liya hai. Isse aapke traffic par koi asar nahi padta.
Comments